|
LITZENTZIAK ETA BAIMENAK
.....................................................................................................................................
ADMINISTRAZIO-EGOERAK.- TRUKEAK
AURRERAKINAK ETA NOMINA AURRERAPENAK
ASEGURUAK ETA ERRETIROAK
.....................................................................................................................................
LIZENTZIAK ETA BAIMENAK
37. artikulua.- Lizentzia eta baimenen zerrenda.
1.- Hitzarmen honek ukitzen dituen langileek lizentzia ordaindua baliatzeko eskubidea daukate, behean adierazten diren denbora eta zioak direla eta:
- Gaixotasun edo istripuagatiko lizentzia
- Haurdunaldi, erditze eta edoskitzaroagatiko lizentzia
- Aitatasunagatiko lizentzia
- Umeak adopzioan hartzeagatiko lizentzia
- Norberaren edo senitartekoen ezkontzagatiko lizentzia
- Senitartekoen gaixotasun larri edo heriotzagatiko lizentzia
- Ezinbestean bete beharreko heginkizun publikoak edo norberarenak betetzeko lizentzia
- Ohiko etxebizitza utzi edo aldatzeagatiko lizentzia
- Sindikatuak edo langileak ordezkatzeko lizentzia
- Langileak betetzen dituen eginkizun edo lanpostuari zuzenean lolutako lanbide-hobekuntzako ikasketak egiteko lizentzia
Lizentzia hauek hartzeari dagokionez, izatezko eta legebidezko bikoteek eskubide berberak izango dituzte.
2.– Halaber, ondoan zehazten diren baimenak ere emango dira, horretarako erabaki diren arauen arabera. Honako hauek dira:
- Adingabekoak, minusbaliatuak edo 2. mailarainoko ahaidetasuna duten senitartekoak zaintzeko baimena
- Gaixotasun kroniko edo mugimen-arazoak dituzten senitartekoak zaintzeko baimena
- Langileak betetzen dituen eginkizun edo lanpostuari zuzenean lotzen ez zaizkion ikasketak egiteko baimena
- Azterketetara joateko baimena
- Medikuaren kontsulta, tratamendu eta azterriak egiteko baimena
- Zientzia, teknika, lanbide, elkargo, elkarte edo sindikatuko ekitaldietan parte hartzeko baimena
- Hautetsien eginkizunak betetzeko baimena
- Norberaren eginbeharretarako baimena
38. artikulua.- Lizentzia eta baimenen arteko bateraezintasunak.
Edoskitzaroaren ziozko etenaren eta adingabekoak, gorputz-, adimen- eta zentzumen-minusbaliatuak edo bigarren mailarainoko senitartekoak zaintzeko lanaldia murriztearen arteko bateragarritasuna izan ezik, ezin da aurreko atalean jasotako lizentzia edo baimen bat baino gehiago aldi berean gozatu. Legezko oporraldian ezin da ordaindutako lizentzia edo baimenik hartu.
39. artikulua.- Lanen berriro hastea.
Lizentzia eta baimenen epeak amaitutakoan, langileek berehalakoan itzuli beharko dute lanera.
40. artikulua.- Gaixotasun edo istripuengatiko lizentziak.
1) Gaixoaldia edo istripua dela-eta, laneko eginkizunak behar bezala ezin bete badituzte, langileek lizentzia izango dute lanera itzultzeko agiria izan arte, baldin eta osasun urgazpeneko zerbitzuek baxa-egoera egiaztatzen badute, betiere kontratuaren iraupena gainditu gabe.
2) Administrazioak, Enpresako Medikuntza Zerbitzuaren azterketa baliatuz, langilearen gaitz edo istripuaren jarraipena egin eta haren egoera egiaztatu ahal izango du, ezintasunaren egoeraz jakin, beharrezko laguntza eman, eta sendatze osoa eta bizkorra lortzeko. Langileak horiek egiteari uko egiten badie, behean aipatzen diren osagarri ekonomikoak gal ditzake, interesdunari entzuteko idatzizko tramitea egin ondoren.
3) Gaixotasun edo istripuaren ziozko aldi baterako ezintasuna izanez gero, langileek lansarien %100 jasoko dute, gehienez ere 18 hilabetean.
Hamazortzi hilabeteko aldia amaitu ondoren, eta langileak epe horretan ezintasun iraunkorra aitortzeko eskabidea egin badu, aurreko paragrafoan adierazitako lansaria jasotzeko eskubidea izango du, harik eta medikuaren alta jasotzen duen arte, elbarritasun edo heriotza-aitortzarik izan edo izan gabe ere. Langileari ezintasun iraunkorra aitortuz gero, ezintasun iraunkor oso, erabateko ezintasun iraunkor edo elbarritasun larria denean, aipatu eskubidea luzatu egingo da GSNEaren erabakian diru-ondoreetarako ageri den egunaren aurrekora arte.
Ondore horretarako, eskubidea eraginkor bihurtzeko eskabidea hilabeteko epe luzaezinean egin beharko da, alta-egunetik edo elbarritasun-maila aitortzen duen jakinarazpena jasotzen den egunetik zenbatzen hasita edo, hala badagokio, elbarritasunik aitortzen ez duen jakinarazpena jaso (senda daitekeelako) edo heriotza jazotzen den egunetik hasita.
Elbarritasuna aitortzeko eskaera hamazortzi hilabete igaroz geroztik egiten bada, saria jasotzeko eskubidea aintzat hartuko da eskaera egin den egunetik hasita.
4) Gaixotasun edo istripuagatiko lizentzia gozatzen den aldian, langileak norbere konturako edo besteren konturako lanik egingo balu, aurreko atalean adierazitako sariaren zenbatekoa jasotzeko eskubidea galduko du eta, gainera, baxa-gertaera horren zioz jasotako kopurua iztuli beharko dio Administrazioari, hilabeteko epean. Bestalde, diziplina-espedientea hasaraz daiteke langile horren aurka.
5) Norbaitek gogoz eta arrazoirik gabe luzarazten badu gaixotasunak edo istripuak sorrarazitako etena, beste erantzukizun batzuk alde batera utzita, diziplina hautsiko du, eta bigarren atalak adierazitako zenbatekoa jasotzeko eskubidea galduko.
41. artikulua.- Haurdunaldi, erditze eta edoskitzaroagatiko lizentzia.
1) Euskal Autonomia Erkidegoko hezkuntza sare publikoko irakasleek haurdunaldi eta erditzeagatiko lizentzia gozatzeko eskubidea dute, hamazortzi astean. Lizentzia hori beste bi astez luza daiteke erditze anizkoitza izanez gero, bigarrenetik aurrerako seme edo alaba bakoitzarengatik. Interesdunak erabaki ahalko du lizentzia nola banatu, baina sei aste hartu behar ditu erditzearen ostean. Ama hilez gero, aitak lizentzia osoa baliatzea izango du edo, hala badagokio, baimena betetzeko falta den zatia.
Aurrekoa gorabehera, eta amak erditzearen ostean hartu behar duen derrigorrezko atsedenaldia kontuan harturik, aitak zein amak lan egiten badute, haurdunaldiaren ziozko atsedenaldia hasten denean, amak aukeratu ahalko du aitak atsedenaren zatirik gozatzea erditu eta gero, amarenaren aldi berean edo horren ostean, lanera itzuli behar izateak amari osasun arriskurik ekarri ezean. Atsedenaldia aldi berean hartzen badute gurasoek, bi zatien batura ezin da hamazortzi astetik gorakoa izan, edo bestela, erditze anizkoitzari dagokion alditik gorakoa.
Lizentziaren guztizko aldia amaitutakoan, emakume langilearen ezaugarri klinikoek lanera behar bezala itzultzea eragozten badiote, aldi baterako ezintasun egoerara igaroko da eta, ondore horretarako, aginduzko tramiteak bete beharko ditu.
2) Aurreko atalean jasotakoaren arabera, aitak gutxienez lau asteko baimena baliatzen baditu, beste bi asteko lizentzia gozatzeko eskubidea izango du.
3) Emakume langileak oporrak gozatzeko aldia gehitu ahalko dio haurdunaldi, erditze eta edoskitzaroagatiko lizentziari, horiek guztiei dagokien eguteGIko urtea amaitu arren.
4) Aurrekoez gain, langileak ordubeteko etena baliatzeko aukera izango du lansaioaren barruan, hamar hiletik beherako seme edo alaba bakoitzarengatik.Eten hori bitan banatzea izango du berezko edoskitze edo edoskitze artifizialerako erabiltzen baditu. Emakumeak nahi badu, ohiko lansaioa ordubetez murriztea eskatu ahalko du, lehengo eskubidea baliatzearen ordez,helburu berbera betetzeko. Aitak ere baliatu ahalko du ordubeteko murrizketa lansaioan edoskitze artifizialari dagokionez, aitak aldez aurretik eskatu eta behar bezala bidezkotzen badu. Eskaera horretan, amaren langile izaera egiaztatu beharko du, baita lizentzia gozatzeko ukoa edo ezintasuna ere.
Emakume langileak aurreko ataleko lizentzia erabili edo guztizko denbora gehitu ahalko dio haurdunaldi eta erditzeagatiko lizentziari, guztira 6 ordu lanegun bakoitzeko.
5) Administrazioak sorospen osagarriak ordainduko ditu, enplegatuak lansariaren %100 jaso dezan amatasun egoeran dagoen bitartean.
42. artikulua.- Aitatasunagatiko lizentzia.
1) Ama erdituz gero, aitak 5 laneguneko lizentzia izango du, ondoz ondoan ala bereiz hartzeko, erditzearen ondoko 15 egunen barruan).
2) Erditzeak amaren osasun egoerari (zesarea...) edo seme/alabaren osasun egoerari arazorik ekartzen badio, edo aitaren ohiko bizilekutik 150 kilometrotik hara gertatzen bada, aitak beste bi lanegun hartzeko eskubidea izango du.
43. artikulua.- Umeak adopzioan hartzeagatiko lizentzia.
1) Sei urterainoko umeak adopzioan hartu edo etxera jasotzeko gertakizunetan, adopzioaren aurreko aldian zein egoera iraunkorrean, langileak (emakumeak nahiz gizonak) etenik gabeko hamazortzi aste hartzeko eskubidea izango du. Aldi hori beste bi astez luza daiteke adopzio anizkoitzetan, bigarrenetik aurrerako seme edo alaba bakoitzarengatik, interesdunak aukeratzen duenean zenbatzen hasita, umea etxera jasotzeko administrazio edo epai erabakia jakinarazten denetik, edo adopzioa onartzen duen epai ebazpena jakinarazten denetik. Era berean, baimenaren iraunaldia hamazortzi astekoa izango da sei urtetik gorako adingabeak etxera jaso edo adoptatzen badira, ezgaitasun edo minusbaliotasunik duten adingabeak izanez gero, edo inguruabar nahiz bizipen pertsonalak direla-eta, edo atzerritik datozela-eta, gizarteratzeko eta familian ohitzeko zailtasun handiak badituzte, betiere horretarako eskumena duten gizarte zerbitzuek behar bezala egiaztatzen badituzte.
Amak eta aitak lan egiten badute, interesdunek erabakiko dute baimena nola banatu, aldi berean edo ondoz ondoan, baina etenik gabeko aldietan. Atsedenaldia aldi berean hartzen badute biek, bi zatien batura ezin da hamazortzi astetik gorakoa izan, edo bestela, adopzio edo jasotze anizkoitzari dagokien alditik gorakoa.
Nazioarteko adopzioei dagokienez, aitak eta amak adoptatuaren jatorrizko herrira joan behar baldin badute, honako artikulu honek gertaeraren arabera arautzen duen baimena adopzioa onartzen duen ebazpena eman baino lau aste lehenagotik ere baliatu daiteke.
2) Aurreko artikuluak araututakoarekin bat etorriz, aitak lau asteko baimena gozatzen badu, beste bi aste baliatzeko aukera izango du.
3) Oporrak gozatzeko aldia adopzio edo etxera jasotzeko lizentziari gehitu ahalko zaio, lizentziari dagokion egutegiko urtea amaitu arren.
44. artikulua.- Norberaren edo senitartekoen ezkontzagatiko lizentzia.
1) Norberaren ezkontza dela eta, langileak egutegiko 20 eguneko lizentzia baliatu ahalko du. Aldi hori ezkontza egin aurretik edo egin ondoren gozatu ahalko ditu, ezkontzeko eguna aldi horren barruan dagoela.
Ezkontzeagatiko lizentzia oporrak hartzeko aldiari gehitu ahal zaio, oporrak hartu aurretik edo hartu ondoren. Dena dela, irakasleak harturiko erabakia gutxienez 15 egun lehenago jakinaraziko beharko dio lurraldeko ordezkaritza egokiari.
2) Beste alde batetik, lizentzia baliatzeko eskubidea izango dute bikotearekiko bizikidetza egonkorrari (ezkontzaz kanpoko bizikidetzak) lotzen zaien enplegatuek, betiere bizikidetzaren ziurtagiri bitartez egiaztatzen badute. Elkarrekin bizi diren pertsonek helbidea daukaten udalerriko udaletxeak luzatzen ditu ziurtagiriak. Bestela, Elkartze Zibilen Udal Erroldak luzatutako ziurtagiri bidez ere egiazta dezakete, halakorik bada.
Ezin da ezkontza edo elkarrekiko bizikidetza egonkorraren ziozko lizentzia berriro baliatu, harik eta lizentzia bat gozatu denetik 6 urte igaro diren arte, eta inola ere, bikotea osatzen duten kideak aurreko berberak badira.
3) Langilearen aita edo ama, aitaginarreba edo amaginarreba, neba-arrebak, ezkonanai-arrebak, seme-alabak, ilobak edo aiton-amonak ezkonduz gero, egun beteko lizentzia izango du, ospakizuna egiten den egunean gozatzekoa. Hala ere, ospakizuna funtzionarioaren ohiko bizilekutik 150 kilometrotik hara egiten bada, 3 egutegiko egun hartu ahal izango ditu.
45. artikulua.- Senitartekoen gaixotasun larri edo heriotzagatiko lizentzia.
1) Gertaera horren zioz, langileak ondoko lizentziak hartu ahal izango ditu: 2. mailarainoko ahaidetasun edo kidetasuna duten senitartekoak edo, elkarrekin bizi izanik, maila horrez gaindikoakhilez gero, 3 lanegun; ezkontideak, bizilagunak, semeak edo alabak gaixotasun larria edukiz gero edo hil, 5 lanegun. 2. mailarainoko ahaidetasun edo kidetasuna duten senitartekoek edo, elkarrekin bizi izanik, maila horrez gaindikoek gaixotasun larria edukiz gero, bi lanegun.
2) Aurreko lizentzia-aldiak beste bi egunez luzatu ahalko dira, gertakizunak langilearen ohiko bizilekutik 150 kilometrotik hara jazotzen badira.
3) 2. mailarainoko ahaidetasun edo kidetasuna duten senitartekoek edo, elkarrekin bizi izanik, maila horrez gaindikoek gaixotasun larria edukiz gero, langileek bigarren lizentzia hartzeko eskubidea dute, lehen lizentzia amaitu zuten egunetik 30 egun igarota, gaixotasun terminalak izan ezean. Azkenekoetan ez da aurreko irizpidea aplikatuko, eta halaber, ezin luzatuko da lizentzia ohiko bizilekutik dagoen distantziaren irizpideagatik.
Langileak 2. mailarainoko ahaidetasun edo kidetasuna duten senitartekoen edo, elkarrekin bizi izanik, maila horrez gaindikoen gaixotasun larriaren ziozko lizentzia baliatzen badu, lizentziak irauten duen bitartean gaixoa hilez gero, hiltzen den egunetik hasita zenbatuko dira heriotzagatiko baimenari dagozkionak.
4) Batzorde Parekideak zehaztuko ditu gaixotasun bat larritzat jotzeko irizpideak. Zalantzarik agertzen den guztietan, gaixotasun larritzat joko da prebentzio Zerbitzuaren medikuntza Arloak halakotzat hartzen duena.
5) Honako artikulu honek arautzen dituen lizentziek ematen dituzten egunak lizentziak emateko gertaerak jazotzen diren egunetan baliatu behar dira, halabeharrez.
46. artikulua.- Ezinbestean bete beharreko eginkizun publikoak edo norberarenak betetzeko lizentzia.
1) Ezinbestean bete beharreko eginkizun publikoak edo norberarenak betetze aldera, langileek eginkizun horiek betetzeko adina denbora baliatu ahalko dute, betiere lan-orduetatik kanpo egiterik ez bada.
2) Nolanahi ere, hitzarmen honen ondoreetarako, honako hauek izango dira ezinbestean bete beharreko eginkizun publiko edo norberarenak:
a) epaitegi, polizia-etxe, gobernu zibil edo militarretako zitazioak, militarren eta armen ikuskatzeak, NAN, pasaportea, egiaztagiriak eta erroldatzeak erakunde ofizialetan;
b) 2. mailarainoko ahaidetasun edo kidetasuna duten gorputz- edo adimen-minusbaliotasuneko senitartekoei laguntzea, haien egoeraren ziozko paper-lan jakinak egitera;
c) gidatzeko baimena atera edo berritu beharra;
d) notarioaren agindeiak eta izapideak;
e) erakunde ofizialetan egin beharreko izapideak;
f) zinegotzi, ahaldun, batzarkide edo legebiltzarkide hautetsia izateagatik, gobernu-organo edo haien mendeko batzordeen bileretara joan beharra.
47. artikulua.- Ohiko etxebizitza utzi edo aldatzeagatiko lizentzia.
Langileak ohiko etxebizitza utzi edo aldatzen badu, 2 laneguneko lizentzia izango du. Lizentzia baliatzeko, erroldatze ziurtagiria aurkeztu beharko du.
48. artikulua.- Sindikatuak edo langileak ordezkatzeko lizentzia.
Sindikatuak edo langileak ordezkatzen dituzten langileek horretarako lizentzia gozatzeko eskubidea dute, egun indarrean dagoen legeriak eta honako hitzarmen honek arautzen dituen xedapenek ezartzen dutenaren arabera.
49. artikulua.- Langileak betetzen dituen eginkizun edo lanpostuari zuzenean lotutako lanbide hobekuntzako ikasketak egiteko lizentzia.
Lizentzia hau ematea hautazkoa da. Hala ere, emanez gero, langileak horri dagokion ordainsaria jaso beharko du.
Honako hitzarmen honen Hobekuntza eta Euskalduntze Batzordeak aztertu eta proposatu beharko du lizentzia kopurua ezarri edo lizentziak ugarituko ote diren aurreikustea, aurrekontuetan hala jasotzeko.
Honako artikulu hau ez zaie ezarriko egonkor ez diren bitarteko funtzionarioei.
50. artikulua.- Adingabekoak, minusbaliatuak edo 2. mailarainoko ahaidetasuna duten senitartekoak zaintzeko baimena.
Legezko zaintza dela eta, hamabi urtetik beherakorik, edo ordaindutako jarduerarik egiten ez duen minusbaliatu fisiko, psikiko edo sentsorialik, edo 2. mailarainoko ahaidetasun edo kidetasuna duen pertsonarik edo, elkarrekin bizi izanik, maila horrez gaindikorik, edo gaixotasun larria izan eta elkarrekin bizi den pertsonarik zaindu behar duten langile guztiek lansaioa murrizteko baimena eskatu ahalko dute. Ohiko lansaioaren erdia edo herena murrizteko eska dezake langileak eta, baimena emanez gero, lansariaren kontzeptu guztiak murriztutako heinean gutxituko dira.
51. artikulua.- Gaixotasun kroniko edo mugimen-arazoak dituzten senitartekoak zaintzeko baimena.
Medikuaren txostenak hala egiaztaturik, gaixotasun larri eta kronikoa edo mugimen-arazoak dituelako, 2. mailarainoko ahaidetasun edo kidetasuna duen senitartekorik edo, elkarrekin bizi izanik, maila horrez gaindikorik zaindu behar duten langileek 50 ordurainoko baimen ordaindu baliatu ahalko dute eskola ikasturtean. Izaera orokorrez, ordu-kopuru hori egunean erabiltzeko muga bi ordukoa izango da, eta betiere, lanera sartu edo irteteko orduei atxikita gozatu beharko da.
52. artikulua.- Langileak betetzen dituen eginkizun edo lanpostuari zuzenean lotzen ez zaizkion ikasketak egiteko baimena.
Langileria Kudeatzeko Zuzendaritzari dagokio baimen hori ematea, langileak eskola ikasturte bateko 8epea ezin da luzatu) ordainsariei uko egin ostean. Bestalde, Honako hitzarmen honen Hobekuntza eta Euskalduntze Batzordeak aztertu eta proposatu beharko du lizentzia kopurua ezarri edo lizentziak ugarituko ote diren aurreikustea, aurrekontuetan hala jasotzeko. Artikulu hau karrerako langile funtzionarioei eta egonkor diren bitarteko langileei -horiei egoera horretan daudenean baino ez- aplikatuko zaie.
53. artikulua.- Azterketak egiteko baimena.
Langileek azterketak egiteko behar adina denbora hartzeko eskubidea dute, azterketak irakaskuntza arlokoak izan eta ikastetxe ofizial edo homologatuetan egin behar badituzte. Baimena egun betekoa izango da egin beharreko azterketa bakoitzeko, ohiko deialdi nahiz apartekoetan, eta azterketariak ziurtagiri egokia aurkeztu beharko du beti. Azterketak egiteko baimena bi egunekoa izango da proba azterketariaren ohiko bizilekutik 150 kilometrotik hara egiten bada. Baimena ordaindu egingo da.
54. artikulua.- Medikuaren kontsulta, tratamendu eta azterriak egiteko baimena.
1) Osasun beharrizanak direla eta, langileek medikuaren kontsulta, tratamendu eta azterrietara lan-orduen barruan joateko eskubidea dute, betiere horiek guztiak behar bezala bidezkoturik egon eta osasun-etxeetako kontsultak lan-orduetatik kanpo ezin egin badira.
2) Erditu aurretiko azterketak eta erditzea prestatzeko tekniken ikastaroa egiteko, langile haurdunek baimen ordaindua baliatu ahalko dute, bata zein bestea egiteko behar den adina denborakoa, gehienez, 4 ordukoa astean. Ondore horretarako, bidezkotu beharko daazterketak nahiz ikastaroak lansaioaren barruan egin behar izatea, eta langileak egiaztatu beharko du haietan parte hartu izana.
55. artikulua.- Zientzia, teknika, lanbide, elkargo, elkarte edo sindikatuko ekitaldietan parte hartzeko baimena.
1) Langileek zientzia, teknika, lanbide, elkargo, elkarte edo sindikatuko ekitaldien baitako biltzar, ikastaro, mintegi, sinposio, bilkura, erakustaldi, hitzaldi, bilera, jardunaldi eta gainerako saioetan parte hartzeko baimena baliatu ahalko du, langileari dagokion lurralde ordezkaritzak horretarako baimena eman ondoren.
2) Langilearen ekimenez eskaturiko baimena ordaindu egingo da, gehienez bost egunean. Hortaz, epe horren gainetiko aldia ez da ordainduko, eta ez du inolako kontzepturik ordaintzeko eskubidea sortuko, ezta dieta, bidaia-gastu, ostatu-gastu edo izena emateagatiko gastuak. Interesdunak ordaindu beharko ditu aurreko guztiak.
56. artikulua.-Hautetsien eginkizunak betetzeko baimena.
Erakundeetako hautetsiak diren langileek egoera horri doazkion eginkizunak betetzeko baimena baliatu ahalko dute, 46 f) artikuluaren egoeretan jasota ez badago. Eginkizunak betetzeko behar adina denbora hartu ahalko du, betiere guztira hartutako denbora urteko lansaioaren %10etik beherakoa bada.
Horrez gain, hautetsi diren langileek ohiko lansaioaren bostena, herena edo erdia murrizteko baimena bailatu ahalko dute, aurrekoaren ordez. Bigarren aukera hautatuz gero, lansariaren kontzeptu guztiak murrizketaren hein berean gutxituko dira.
57. artikulua.- Norberaren eginbeharretarako baimena.
1) Aparteko gertaera guztiz bidezkotuetan izan ezean, norberaren eginbeharretarako baimena eskatzea dauka langileak jarduneko zerbitzuan gutxienez urtebete eman ondoren.
2) Norberaren eginbeharretarako baimenak ez dira ordainduko eta, gainera, gozatutako egunen kopurua oporren aldiari kenduko zaio. Norberaren eginbeharretarako egun-kopuru metatua ezin da hiru hilekotik gorakoa izan bi urtean.
Bi urteko aldia zenbatzen hasiko da langileak baimena gozatzen duen lehen egunetik aurrera. Hortaz, langileak hiru hileko baimena hartzen badu, ezin izango du halako baimenik berriro ere baliatu bi urte igaro arte. Aldi laburragoko eskaerei dagokienez, langileak gozatzen duen lehen egunean bertan hasiko da zenbaketa, eta egun horretatik bi urtera, norberaren eginbeharretarako beste baimen batzuk hartu ahalko ditu, hiru hilabete egin arteko egun-kopuruaren arabera.
Baimena ikasketa ofizialak egiteko eskatzen bada, etenik gabeko lau hilabete hartu ahalko ditu langileak, urtean behin.
Bestalde, hala zehazten den egoeretan, langileak ohiko lansaioaren herena murriztu ahalko du ikasketa ofizialak egiteagatik. Horrelakoetan, murrizketaren hein berean gutxituko zaio lansaria.
Baimena garabidean dauden herrialdeetan aritzeko eskatzen bada, gobernuz kanpoko garapen antolakundeen itzalean, iraupen metatua ezin da urtebetetik gorakoa izan bots urtean, eta gutxienez, hiru hileko baimena hartu beharko du langileak.
3) Administrazio eta Herri Erakundeen Kidego eta Eskaletara sartzeko deialdien hautaprobak eta ariketak egiteko ere emango da baimena. Baimen hori probak egiteko behar adinako denborakoa izango da.
Halaber, askatasun-gabeziako zigorrak bete eta 2. mailarainoko ahaidetasuna duten senitartekoei bisita egiteko baimena emango da, ikustaldia egiteko behar adinako denboraz, betiere, bisitak lan-orduetatik kanpo ezin egingo balira.
4) Bitarteko langileek ere baimen hori baliatzeko eskubidea dute, 31.1 artikuluak arautzen dituzten baldintzen arabera.
5) Baimena emateko aukerak, zeinahi modalitatetan, zerbitzuaren beharrizanak aintzat hartu beharko ditu. Hala ere, baimena ukatzen bada, erabakik arrazoizkoa izan beharko du.
ADMINISTRAZIO EGOERAK.- TRUKEAK.
58. artikulua.- Eszedentziak eta zerbitzu bereziak.
Gai horiei dagokien indarreko araudia aplikatuko zaie, bai eta Euskal Autonomia Erkidegoko organo eskudunek egiten duten legeen garapena ere.
59. artikulua.- Zerbitzuak etetea, askatasun-gabetzearen zioz.
Askatasun-gabetzea dela eta, zerbitzua etenda daukan langileak lanpostua gordetzekoeskubidea izango du, zigor-epaia ezarri arte. Bien bitartean, jaso beharreko ordainsari guztiak jasoko ditu, funtzionario publikoei buruz indarrean dagoen legeria aplikatzeko.
Honako artikulu honek karrerako funtzionarioentzat baino ez du balio.
60. artikulua.- Zerbitzuak aldi baterako etetea.
Egonkor diren emakumezko irakasle funtzionarioek zerbitzuak ematea aldi baterako eten ahal izango dute seme-alabak zaintzeko, erditzeagatiko eta edoskitzaroagatiko lizentzia amaitzen denean (biak metatuta), haurrak hiru urte betetzen dituen arte. Irakasleari lanpostua gordeko zaio, egonkorraren egoerarekin bateragarri den heinean, eta antzinatasuna zenbatezko balioko du. Gertaera hori baliatu ahal izango dute baldin eta eragingarriro bermatzen bada, etetea amaitzen denean, zerbitzuak emateko aldia etena baino luzeagoa izango dela.
61. artikulua.- Trukeak.
1) Hezkuntza administrazioko sailburuordeak jardunean dauden funtzionarioen arteko destino-trukeak baimendu ahalko ditu, baldin eta honako baldintza hauek betetzen badira:
a) Irakasleek aritu beharreko lanpostuak antzekoak izan eta lanpostua betetzeko era berdina izatea.
b) Trukea egin nahi duten funtzionarioek jardunean emandako urte-kopuruak 5 urte baino gutxiagoko aldea izatea.
c) Lurralde ikuskaritza egokiek aurretiazko txostena egitea.
2) Trukea onartzen denetik, hamar urteko epean ez zaie beste trukerik onartuko interesdunei.
3) Ezin da funtzionarioen arteko trukerik onartu horietako bati derrigorrezko erretiroa hartzeko hamar urte baino gutxiago falta badu.
4) Trukea egiten denetik bi urteko epean, trukatzaileren batek borondatezko erretirorik hartzen badu, trukeak baliogabetuko dira.
5) Behin-behineko irakasleek eta egonkor diren bitarteko funtzionarioek lurralde trukeko sistema borondatezkoa baliatu dezakete ikasturtearen hasieran. Hala ere, prozedura hori ez zaio mugatuko eskaera gutxien aurkeztu diren lurraldean egindako guztizko eskaeren kopuruari, eta gainera, trukatzeko aukera plangintzaren beharrizanen araberakoa izan daiteke.
Honako artikulu hau ez zaie aplikatuko egonkor ez diren bitarteko funtzionarioei.
AURRERAKINAK ETA NOMINA AURRERAPENAK
62. artikulua.- Aurrerakinak.
Unean-unean erabilgarri dauden aurrekontuko zuzkidurak kontuan hartuta, jardunean dauden langileek, hileko soldata likidoaren %100eko aurrerakin arruntak jasotzeko eskubidea izango dute, inolako interesik gabe, baldin eta lan-kontratua aurrerakina eskatutako hilaren amaieran bukatzen ez bada. Aurrerakina eskatu den hileko nominan konpentsatu beharko da.
Halaber, hileko atxikipenen bat duten langileentzako aurrerakin handiena hileko soldata likidoaren ehuneko 100 ken arestian aipatu dugun atxikipenaren zenbatekoa izango da.
63. artikulua.- Nomina aurrerapenak.
Hitzarmen honek ukitzen dituen jarduneko langileek nominaren zati bat aurreratzeko eskubidea izango dute, hitzarmena argitaratzen den egunetik bertatik hasita, ondoan jasota dauden arauekin bat:
Nomina aurrerapentzat hartuko da egin gabeko lanari dagozkion ordainsariak abonatzea.
1) Administrazioak eman dezakeen nomina aurrerapenik handiena 4.207 €-koa da. Hala ere, nomina aurrerapena emateko, bosgarren atalak premia biziko inguruabar gisan jasotakoren bat azaldu behar da. Nolanahi ere, aipatutako atalak arautzen dituen e), f), g), h), i), j), k), eta l) inguruabarretan, eskatzaileak, premia bizia egiaztatzeko, eskabidean erantsi behar dituen gastuen frogagirietan jasotako kopurua aintzat hartuko da, beti ere gehienez ezarri den mugatik behera.
2) Aurrerapena itzultzeko gehienezko epea 24 hilekoa izango da. Aurrerapenek ez dute inolako interesik sortuko, eta gehienez ezarritako epea amaitu baino lehen itzul daitezke.
3) Ezin da beste nomina aurrerapenik eman, aurretiaz harturiko konpromisoak zeharo kitatu ez badira. Halaber, gutxienez sei hilabete igaro beharko dira nomina aurrerapen bat kitatzen denetik beste aurrerapen bat eskatzen den arte. Hala ere, f) atalean jasotako inguruabarrak gertatuz gero, aurrerapen bakarra baliatu ahalko da hamar urteko epean. Autoa erosteari dagokionez, ezin da arrazoi berberagatiko aurrerapenik eman, harik eta aurrekoa eman denetik 5 urte igaro ez badira.
Nomina aurrerapenen onuradunen administrazio egoera aldatu, eta nomina eteten bazaie 6 hilabetetik gorako epean, emandako nomina aurrerapenaren zenbateko oso-osoa itzuli beharko dute.
4) Kreditu bizien gehieneko saldoa soldata-masaren %2koa izango da.
5) Premia biziak.- Premia biziko egoeratzat hartuko dira ondokoetatik eratorritakoak:
a) Eskatzailearen ezkontza edo bikotearekiko bizikidetza iraunkorrean hastea, behar bezala egiaztatuta.
b) Eskatzailearen dibortzioa, banantzea edo ezkontzaren baliogabetasuna.
c) Ezkontide, seme edo alaben heriotza.
d) Seme-alaben jaiotza, haurrak adoptatu eta etxera jasotzea.
e) Eskatzailearen, ezkontidearen, bizilagunaren, seme-alaben edo etxera jasota dituen adingabeen gaixotasun larria edo kirurgi ebakuntza zaila.
f) Ohiko etxebizitza eskuratzea eta bankuko kredituak amortizatzea, ohiko etxebizitza eskuratzearen zioz. Egoera horretan, 9.015 € ere aurreratu ahalko dira, eta eskatzaileak, gehienez, 48 hilabeteko epean itzuli ahalko du.
g) Ohiko etxebizitzari eusteko lan beharrezko eta ezinbestekoak egin behar izatea.
h) Ohiko etxebizitzaz aldatzea, lantokia dagoen herrira.
i) Ohiko etxebizitza atontzeko altzariak erostea.
j) Eskatzaileak egiten dituen ikasketen matrikula ordaintzeko gastuak, ikastetxe ofizialetan.
k) Ibilgailua erostea. Ibilgailua lana dela-eta erabiltzeko erosten bada, Hezkuntza Sailaren Zerbitzuen Zuzendaritzak hala bidezkotuta, maileguaren zenbatekoa 5.409 €-koa ere izan daiteke, eta eskatzaileak, gehienez, 36 hilabetetan itzuli ahal izango du.
l) Premia biziko kalifikazioa merezi duten antzeko inguruabarrak.
Langileria Kudeatzeko Zuzendaritzak ukatzen dituen eskaeren berri emango dio aldian-aldian Batzorde Parekideari.
6) Izapidetzea.- Nomina aurrerapenak jaso nahi izatekotan, eskaerak aurkezteko gehieneko epea bi hilekoa izango da eskatzeko inguruabarra gertatzen denetik zenbatzen hasita. Hala ere, aparteko egoeretan, eskatzeko eragilea jazo baino hilabete lehenago aurkeztutakoak onar daitezke, nomina aurrerapena onartzen denetik bi hilabetera egiaztagiri egokiak aurkezteko konpromisoa eransten bazaio eskabideari. Behar bezala bidezkotutako egoeretan izan ezean, konpromiso hori urratzen bada, aurrerapena bertan behera utziko da berehalakoan.
Nomina aurreratzeko eskaerak Hezkuntza, Unibertsitate eta Ikerketa Sailaren Langileria Kudeatzeko Zuzendaritzari aurkeztu beharko zaizkio, lurralde ordezkaritza egokia dela bide. Lurralde ordezkaritzak, aurreko paragrafoan ezarritakoa betetzeko, eskaera jaso dueneko data agerrarazi beharko du eta, halaber, eskaeraren jatorriari buruzko aurretiko txostena egin beharko du.
Honako artikulu hau ez zaie aplikatuko egonkor ez diren bitarteko funtzionarioei.
ASEGURUAK ETA ERRETIROAK
64. artikulua.- Istripu, bizitza eta erantzukizun zibileko asegurua.
1) Honako hitzarmen hau sinatzen denean, administrazioak istripu polizen estaldura eguneratuko du, ondoko kapitalen arabera:
Heriotza:................................................18.030 €
Erabateko Ezintasun Iraunkorra: .............18.030 €
Ezintasun Iraunkor Osoa: .......................18.030 €
Ezintasun Iraunkor Partziala:...................18.030 €-raino, baremoaren arabera
2) Honako hitzarmen hau sinatzen denetik hiru hilabeteko epearen barruan, Administrazioak indarrean dagoen bizitza-aseguru eta erabateko ezintasun iraunkorreko aseguruen polizaeguneratuko du, 18.030 €-ko estalduraz.
3) Hitzarmen honek ukitzen dituen langileak babestuta daude administrazio autonomiadun honek Euskal Autonomia Erkidegoko Administrazioaren alde, haren antolakuntza autonomiadunen alde, ordezkari enplegatu eta eginkizunak betetzen nahiz lanbide jardueran aritzen diren mendeko pertsona guztien alde harpidetu duen erantzukizun zibileko polizari esker.
Polizaren estalduraren muga 6.010.000 €-koa da, gainerakoei egindako kalteengatik. Hala ere, 1.202.000 €-koa azpi-muga dauka ezarrita, eta hori baliatuko da kalteak sortzen badira administrazioko langileen lanbide erantzukizunaren zioz.
4) Arestian azaldutako polizen norainokoa berrikusteko azterketa egingo da.
5) Administrazioak sorospidez bere gain hartzen du irakasleen erantzukizun zibila, eskolaz kanpoko jardueretan edo jarduera osagarrietan betetzen dituzten irakaskuntza eginkizunetatik eratortzen denean ere.
65. artikulua.- Borondatezko erretiroa.
1) Klase pasiboen sistemari atxikitako irakaskuntza kidegoen funtzionarioek LOGSEren bederatzigarren xedapen iragankorrak xedatzen duen borondatezko erretiroaren aukera baliatu ahalko dute. Horrela, zerbitzu-denboraren 5 urterainoko gehipen osagarria esleituko zaie. 60 urte baino gehiago eduki eta zerbitzuan 28 urte baino gehiago eman dituzten funtzionarioei borondatezko erretiroaren sari osagarria ordaindu die Hezkuntza, Unibertsitate eta Ikerketa Sailak, nork bere borondatez erretiratuz gero. Borondatezko erretiroaren saria erretiroaren pentsioaren eta LOGSEk arautzen duen aparteko haborokinaren arteko batura osatuko du, irakaslea 65 urte izan arte jardunean aritu izan balitz kobratuko lukeen ordainsari gordinaren %99era iristeraino.
Halaber, Gizarte Segurantzaren mendeko funtzionario, lan-kontratuko langile eta egonkor diren bitarteko funtzionarioek beren borondatez erretiratuz gero, arestian aipatu dugun xedapen iragankorrak ezarritakoaren antzekotasunaz, Hezkuntza, Unibertsitate eta Ikerketa Sailetik jasoko lukete LOGSEren arabera kobratu behar izango luketen aparteko haborokinaren zenbatekoa.
Batzorde Parekideak aztertuko du honako artikulu honetan ezarritakoa nola aplikatu Gizarte Segurantzaren Erregimen Orokorraren mendeko langileei eta beste aurreikuspen-erregimen batzuen mendeko langileei, Munpal-ekoei eta abarrei.
2) Hala ere, LOGSEren bederatzigarren xedapen iragankorrak xedatutako erregimena baliatu nahi ez duten enplegatu publikoek borondatezko erretiroaren saria jasotzeko eskubidea izango dute, ondoan zehazten diren zenbatekoen arabera, honako hauek betetzen baldin badituzte: a) borondatez erretiratzeko eskaera, gutxienez, borondatez erretiratzeko adina bete baino hiru hilabete lehenago egin behar da; eta b) eskubide hori hilabeteko epean baliatu behar da, egintza horri dagokion aurretiazko izapidearen erantzuna ezagutzen denetik zenbatzen hasita.
Nolanahi ere, ondore ekonomikoek eragina izango dute borondatez erretiratzeko adina betetzen den egunetik aurrera.
Hileko ordainsarien kopurua zehazteko helburuz, goian aipaturiko baldintzetako bat betetzen ez duten langileek urtebete gutxiago faltako dute derrigorrezko erretiroari heltzeko. Bestela, egintza horri dagokion aurretiazko izapidea gorabehera, gerta daiteke adina betetzen duenean erretiratu ahal izatea.
Ordainsariaren zenbatekoa beheko eskalaren arabera kalkulatuko da, betiere kontuan harturik ordainsari gordina dela.
Adina |
Hileko ordainsarien kopurua |
60 urte |
18 |
61 urte |
14 |
62 urte |
10 |
63 urte |
6 |
64 urte |
3 |
Funtzionarioa derrigorrezko erretiroa iritsi baino 5 urte lehenago edo are lehenago erretiratzen bada, guztira 18 hileko ordainsari gordin jasoko ditu.
Kalte-ordaina osatzen duten hileko ordainsarietako bakoitza borondatezko erretiroa hartzen duen prestona interesdunaren urteko ordainsari gordinaren hamabirena izango da.
Kalte-ordainik jaso ahal izateko, eskatzaileak azken hamar urteak jardunean eman behar izan ditu edo, bestela, plaza gordetzea dakarren administrazio-egoeran.
Ezarritako kalte-ordaina eraginkorra izango da irakaslearen erretiroa adierazten duen Gizarte Segurantzaren Nazio Erakundearen ebazpena eta ondoreen data aurkeztu ondoren. Halaber, interesdunak elbarritasun espedienterik abiarazi ez duela egiaztatzen duen Gizarte Segurantzaren Nazio erakundearen agiria aurkeztu beharko du aurrekoekin batera.
3) Gainera, erretiroei buruzko araudi berariazkoa ezarriko da, irakasleek horri heltzeko aukera zabalagoa izan dezaten.
66. artikulua.- Gizarte Fondoa.
60.101 €-ko fondo ekonomikoa baliatuko da aparteko gizarte urgazpenak finantzatzeko, atalburu honek kontuan hartzen ez baititu halakoak.
Administrazioak, Batzorde Parekidearen bitartez, fondo horren erabileraren berri emango du.
|
